TAHAN

Pumara ka't sumakay ng taxi.

Nagsimulang umagos ang pighati

Init na nanunuot sa magkabilang pisngi;

Pagdaloy na hindi mapatid-patid.

Nagtanong ang drayber.

Pamilyar ang kaniyang mukha

Kahit pa pinalalabo ng luha ang mga mata.

Hindi mo masumpungan ang sariling tinig.

Pagmulat mo'y nasa harap ka ng tahanan.

Gaan sa pagitan ng pag-aagam-agam.

Niyakap ka niya nang ubod nang higpit:

Yakap na bukod sa ina, sa kaniya mo lamang

Tanging nararamdaman.

Doon mo nasumpungan ang pagtahan.